جنرال مایکل کوریلا، فرماندهی مرکزی ارتش آمریکا "سنتکام" می‌گوید که احتمالاً هواپیماها و چرخبال‌های نظامی که در زمان سقوط حکومت پیشین افغانستان به تاجیکستان منتقل شدند، به این کشور واگذار شود.
جنرال مایکل کوریلا در تاجیکستان گفت که این وسایط قطعا به افغانستان بازگردانده نخواهند شد زیرا مربوط به طالبان نمی‌شود.
به گزارش خبرگزاری رویترز این جنرال آمريکايی گفته که آمریکا تصمیم دارد شماری یا همه این هواپیماها را در اختیار تاجیکستان قرار دهد.
جنرال کوریلا گفت: "هدف ما این است که بتوانیم برخی یا همه هواپیماها را به حکومت تاجیکستان واگذار کنیم. من جدول زمانی که چه وقت این اتفاق خواهد افتاد را ندارم اما سخت تلاش می‌کنیم تا این کار را انجام دهیم."
این جنرال آمریکایی از نیروهای مسلح تاجیکستان به‌خاطر نگهداری از این هواپیماها قدردانی کرده است. 
جنرال کوریلا گفته که با دولت تاجیکستان در مورد استفاده مؤثر و نگهداری از این هواپیماها همکاری می‌کند.
گفتنی است که هنگام سقوط دولت پیشین افغانستان، پیلوت‌های(خلبانان) افغانستان که از سوی آمریکا آموزش‌ دیده بودند، برای نجات جان‌ خود با ده‌ها هواپیما و هلیکوپتر ارتش پیشین افغانستان به تاجیکستان و اوزبکستان فرار کردند.
طالبان از این دو کشور خواسته است که این هواپیماها را به آنان تحویل دهند.