ریاست‌های معارف ولایت‌های پکتیا و لوگر می‌گویند که سیلاب‌های اخیر در مرکز و شماری از ولسوالی‌های این دو ولایت به ۵۶ مکتب آسیب رسانده‌است.

نیک محمد منیب، رئيس معارف پکتیا امروز یک‌شنبه (۶ سنبله/شهریور) گفته است که ۱۷ مکتب در شهر گردیز، ۶ مکتب در ولسوالی احمدآباد، ۷ مکتب در ولسوالی زرمت، ۴ مکتب در ولسوالی وزی زدران و ۱ مکتب در ولسوالی سمکنی در اثر سیلاب‌های اخیر آسیب دیده‌اند.

منیب گفت که از این میان، ۱۲ مکتب در شهر گردیز و ولسوالی‌ زرمت آسیب جدی دیده اند.

همچنین منیب گفته که ۶ مدرسه دینی نیز در این ولایت در اثر سیلاب آسیب دیده‌اند.

از سویی دیگر، ریاست معارف لوگر نیز می‌گوید که سیلاب‌های اخیر به ساختمان‌های ۲۴ مکتب در این ولایت آسیب وارد کرده‌است.

به گفته ریاست معارف این ولایت، مکاتب آسیب دیده در شهر پل علم مرکز و ولسوالی‌های بره‌کی‌برک، خوشی، محمدآغه، خروار و آزره موقعیت دارد.

این در حالی است که وزارت دولت در امور مبارزه با حوادث نیز دیروز اعلام کرد که ۱۹۴ نفر در سیلاب‌های یک ماه گذشته کشته و ۲۶۵ نفر دیگر زخمی شده اند.