دومین نشست سران کشورهای آسیای مرکزی و اتحادیه اروپا روز جمعه، ۱۲ جوزا، به میزبانی قرقیزستان در شهر چلپون آتای این کشور برگزار شد که سران پنج کشور آسیای مرکزی و چارلز میشل، رییس شورای اتحادیه اروپا و تیم همراهش در آن اشتراک کردند.

در این نشست طرف‌ها بر اهمیت ایجاد یک حکومت فراگیر و نماینده در افغانستان، تاکید و بر اهمیت ارتقاء و احترام به حقوق بشر و آزادی‌های اساسی همه شهروندان افغانستان به ویژه زنان، دختران و گروه‌های قومی پافشاری کردند.

از سوی دیگر، میان شورای اتحادیه اروپا و سران کشورهای آسیای مرکزی روی تشدید تلاش‌ها برای مبارزه با گسترش ایدیولوژی تروریسم و تبلیغات از طریق اینترنت توافق صورت گرفت‌.

رییسان جمهور اوزبیکستان و تاجیکستان اعلام کردند تلاش‌های جامعه جهانی برای کمک به مردم افغانستان به‌گونه اصولی و مطابق با قوانین بین‌المللی، معیارها و اصول شناخته شده جهانی باشد.

نخستین دور نشست سران اتحادیه اروپا و کشورهای آسیای مرکزی سال گذشته میلادی در شهر آستانه قزاقستان برگزار شده بود.