کنسولگری افغانستان در خاروغ تحت نظر طالبان فعالیت می کند

نقیب‌الله دهقان‌زاده، سرپرست کنسول‌گری افغانستان در شهر خاروغ تاجیکستان گفت این نمایندگی با حمایت و زیر نظر مستقیم وزارت امور خارجه طالبان، فعالیت می‌کند.

دهقان‌زاده همچنان سخنان اخیر ظاهر اغبر را غیرمسئولانه و بدور از حقیقت خواند.

به گفته وی، این نمایندگی مطابق با اصول و صلاحیت‌های قانونی خود فعالیت می‌کند.

گفتنی است ظاهر اغبر، روز سه‌شنبه، ۱۶ عقرب، در واکنش به معرفی فیض‌الله به عنوان دیپلمات اول سفارت افغانستان در تاجیکستان از سوی طالبان، با پاره کردن مکتوب تعیینی او گفت این گروه نزد آنان مشروعیت ندارد.

وی افزوده است: من به مردم اطمینان می‌دهم که تا آمدن یک نظام مشروع هیچ نوع مشروعیت این گروه در نزد ما ندارد.

سفارت افغانستان در دوشنبه یکی از مراجع دیپلماتیک کشور است که با گذشت بیش از دو سال تا کنون به طالبان تحویل داده نشده است.

این در حالی است که در اوایل سال روان نیز وزارت امور خارجه طالبان مدعی شده بود که هیاتی از این وزارت از کنسول‌گری افغانستان در خاروغ، مرکز ولایت بدخشان تاجیکستان، دیدار کرده است.