دفتر هماهنگی کمک‌های بشردوستانه سازمان ملل می‌گوید که دولت نروژ ۱.۸ میلیون دلار به افغانستان کمک کرده است.

این نهاد امروز با نشر اعلامیه‌ای گفته که این پول به صندوق بشردوستانه افغانستان کمک شده است.

در اعلامیه از این کمک نقدی ناروی قدردانی شده است.

اوچا اعلام کرده است نروژ طی ۱۰ سال اخیر ۱۸۹ میلیون کرون به صندوق بشردوستانه افغانستان کمک کرده است. 

این در حالی است که پیش از این، نهادهای امداد رسان از عدم تمویل برنامه‌های کمک رسانی به نیازمندان در افغانستان ابراز نگرانی کرده‌اند.

به گفته این نهادها در سال جاری میلادی نزدیک به ۲۴ میلیون نفر در افغانستان به کمک‌های بشردوستانه نیاز دارند که بخش بزرگ آنان به دلیل عدم تمویل برنامه‌های کمک‌رسانی، از برنامه باز مانده‌اند.