درگیری مسلحانه در مرز افغانستان و تاجیکستان
منابع محلی در ولایت بدخشان از درگیری مرزبانان تاجیکستان با گروهک انصار الله خبر داده اند.
منابع محلی در ولایت بدخشان می‌گویند دست‌کم سه جنگجوی جماعت انصارالله در پی درگیری با مرزبانان تاجیکستان کشته شده‌اند.
این منابع گزارش داده اند این افراد روز سه‌شنبه، ۱۴ سنبله، در مرز میان افغانستان و تاجیکستان کشته شده‌اند.
به گفته این منابع، این درگیری زمانی رخ داده است که جنگجویان گروه جماعت انصارالله می‌خواستند از طریق ولسوالی درواز ولایت بدخشان افغانستان وارد خاک تاجیکستان شوند.
مقام‌های تاجیکستانی و گروه جماعت انصارالله تا کنون به‌گونه رسمی در این مورد ابراز نظری نکرده‌اند.
افراد گروه جماعت انصارالله در حالی می‌خواستند از طریق افغانستان وارد خاک تاجیکستان شوند که طالبان همواره حضور گروه‌های «تروریستی» در کشور را تکذیب کرده‌اند.
براساس توافق دوحه، طالبان متعهد شده بودند که روابط خود با گروه‌های تروریستی منطقه‌ای و بین‌المللی را قطع کنند.
